தமிழ் மருந்துகள்
கி.ஆ.பெ. விசுவநாதம்

முன்னுரை

நம் நாட்டு வைத்தியம் என்று பொதுவாகக் கூறப்படுவது மூன்று. அவை சித்தமருத்துவம் யூனானி, ஆயுர்வேதம் எனப் பெயர் பெறும் யூனானி உருதுமொழிக்கும், ஆயுர்வேதம் வடமொழிக்கும் சித்த மருத்துவம் தமிழ் மொழிக்கும் உரியவை. ஆயுர்வேத மருந்துகள் பெரும்பாலும் பஸ்பமும் திராவகமுமாகவும், யூனாணி மருந்துகள் பெரும்பாலும் அல்வாவும் இலேகியமுமாகவும், சித்த மருத்துவ மருந்துகள். பெரும்பாலும் எண்ணெயும் கியாழமுமாகவும் இருக்கும்.

சித்தர்கள் நம் நாட்டுப் பேரறிஞர்கள்; நமது முன்னோர்கள். அவர்கள் துருவி ஆராய்ந்து, கண்டுபிடித்துக் கையாண்டு கொடுத்துப்போன செல்வமே சித்த மருத்துவமாகும். இவ்வைத்தியம் தோன்றிய காலத்தை எவராலும் குறிப்பிட்டுக் கூற இயலாது. கூறவேண்டுமானால் தமிழகத்து மண்ணில் செடி கொடிகள் தோன்றிய காலம் என்றே கூறவேண்டும்.

தமிழ் மருத்துவம், தமிழ் நாட்டில், தமிழ் அறிஞர்களால், தமிழ் மொழியில் கூறப்பெற்றவை என்ற சிறப்பை மட்டும் பெறவில்லை. அது தமிழகத்தின் தட்ப வெப்ப நிலைக்கு ஏற்பத் தமிழகத்தில் வாழும் மக்களுக்கு வருகின்ற நோய்களைப்போக்க, தமிழகத்தில் முளைக்கும் செடி கொடிகளையே மூலிகைகளாகக் கொண்டிருக்கிறது என்ற பெருஞ் சிறப்பையும் பெற்றிருக்கிறது.

தமிழ் மருந்துகள், காலத்தால் முந்தியும், திறமையால் மிகுந்தும், விலையால் குறைந்தும், கையாள்வதில் சிறந்தும் இருந்தும், அது தமிழ் மன்னர்கள் இறந்தும், தமிழரசு அழிழ்ந்தும், தமிழ் உணர்ச்சி குறைந்தும்விட்ட காரணத்தால், தன் சிறப்பை இழந்து வருகிறது. தமிழ் மருத்துவர்களும் வறுமை வாய்ப்பட்டுத் தவறு செய்கின்றனர். தோன்றிய தமிழ் மருத்துவ உயர்நிலைப் பள்ளியும் எடுபட்டுப் போயிற்று. இருக்கும் ஒரு கல்லூரியும் தவறான பாதையில் திருப்பிவிடப்பட்டிருக்கிறது. தாய் வழி மகள் காதுவழிக் கேட்டு, கைவைத்தியமாகச் செய்து வந்த பிள்ளை வைத்தியம், குடும்ப வைத்தியம் அருகி மறைபட்டு வருகிறது. இது நாட்டின் தீமையே யாகும்.

தமிழ் மக்களுக்கு உணர்ச்சி வராதா? தமிழ் நாடு தன்னரசு பெறாதா? தமிழ் மருத்துவம் தன்னிடத்தை அடையாதா? வரும், பெறும், அடையும் என்று நான் நம்புவதுண்டு. அதற்குரிய முதற்படியும் சிறுபணியுமே இந் நூல். இந் நூலிற் கூறப்பெற்றுள்ள அனைத்தும் எங்கள் பெரும் குடும்பத்திற் கையாண்ட 100-க்கு 80-ம் 90-ம், 100-க்கு 100-ம் வெற்றிபெற்ற அனுபவ உண்மை களாகும். தமிழக மக்கள் இதனைப் பயன்படுத்திப் பயன் அடைவார்களாக!

வாழ்க தமிழகம்

தங்களன்பிற்குரிய
கி.ஆ.பெ. விசுவநாதம்

இந்த புத்தகம் பிடித்திருந்தால்....

மதிப்பிட நட்சத்திரத்தைச் சொடுக்கவும்!!!

சராசரி மதிப்பீடு 0 / 5. வாக்கு எண்ணிக்கை: 0

இந்தப் பதிவிற்கு மதிப்பீடு அளிக்கும் முதல் நபராக இருங்கள்!!!

Leave a Reply

Your email address will not be published. Required fields are marked *