சிறுவர் பாட்டு
நாரா. நாச்சியப்பன்

அன்பு

அன்பு கொண்டாடிடு கண்ணே-உயிர்கள்
அத்தனையின் மேலும் மெத்தமெத்த நீயே
அன்பு கொண்டாடிடு கண்ணே,

பெற்று வளர்த்தவர் அப்பா அம்மா-கூடப்
பிறந்து வளர்ந்தவர் அண்ணன் தம்பி
கற்றுக் கொடுத்தவர் பள்ளி ஆசான்-நம்மைக்
கண்டு மகிழ்ந்திடும் நண்பர் மீதே
அன்பு கொண்டாடிடு கண்ணே.

துள்ளிப் பறந்து திரியும் சிட்டு – சிறிது
சோற்றைக் கண்டு வரும்அக் காக்கை
அள்ளிப் போட்ட உணவுக் காக – வாலை
ஆட்டி நன்றி காட்டும் நாய் மேல்
அன்பு கொண்டாடிடு கண்ணே!

ஆசை

எல்லோரும் உன்னை
நல்லவன் என்றே
ஏற்றிப் புகழ்ந்திட வேண்டும்
அதைக் கேட்டே என்
எண்ணங் குளிர்ந்திட வேண்டும்

கற்றவர் போற்றிடும்
கல்வியில் சிறந்துநீ
கண்ணாய்த் திகழ்ந்திட வேண்டும்
அதைக்கேட்டே என்
எண்ணங் குளிர்ந்திட வேண்டும்.

என்றன் ஆசையை
ஏற்று நிறை வேற்ற
என்றும் முயன்றிட வேண்டும்
அதைக் கேட்டே என்
எண்ணங் குளிர்ந்திட வேண்டும்.

இன்பம்

அன்புத் தாயைக் கண்ட போதும்
ஆசைப் பொருள்கள் கிடைக்கும் போதும்
துன்பம் சேர்க்கும் அடிமை வாழ்வு
தொலைந்த போதும் தோன்றும் வாழ்வில்
இன்பம் இன்பமே! – ஆ! ஆ!
இன்பமே இன்பமே!

கருத்து மிகுந்த பாட்டின் இசையும்
காட்டு முல்லைப் பூவின் மணமும்
சிரித்துக் காட்டும் இயற்கை யழகும்
தென்றல் காற்றும் நல்ல நினைப்பும்
இன்பம் இன்பமே!-ஆ! ஆ!
இன்பம் இன்பமே!

உண்மை யான நண்ப ரோடும்
உலகம் அறிந்த புலவ ரோடும்
தண்மை யாகப் பேசு கின்ற
சான்றோ ரோடும் சேரும் போதில்
இன்பம் இன்பமே!-ஆ! ஆ!
இன்பம் இன்பமே!

ஈகை

இல்லா தொருவன் கேட்டாலே – தம்பி
இருந்தால் கொடுத்தே உதவிடுவாய்
இதுதான் தருமம் அறிந்திடுக – தம்பி
இதுதான் ஈகை அறிந்திடுக!

காலும் கையும் இல்லாதோர் – தம்பி
காசும் பணமும் இல்லாதோர்
நாலு பேரை நம்பித்தான் வாழ்க்கை
நடத்த வேண்டும் தெரிந்துகொள்!

ஈஈ என்று சிரித்தபடி – வந்து
இரக்கும் ஏழைக் கிரங்கிடுவாய்
ஆ!ஆ! என்று மகிழ்ச்சியுடன் – தம்பி
அள்ளி அள்ளிக் கொடுத்திடுவாய்!

ஏதும் கிடைக்கும் என நம்பிக் – கையை
ஏந்தி வந்து நிற்போனை
ஏமாந் தோடச் செய்யாதே – தம்பி
இயன்ற மட்டும் கொடுத்திடுவாய்!

உண்மை

உண்மை பேசும் உத்தமனை
உலகம் முற்றும் புகழ்ந்தேத்தும்
உண்மை பேசும் உத்தமனை
ஊரும் நம்பிக் கொண்டாடும்

மனதிற் பட்ட கருத்தினையே
மறையா துரைப்போன் உயர்ந்தவனாம்
மனிதர் கூட்டம் அவன்சொல்லை
மதித்துப் போற்றி நடந்திடுமாம்

இருட்டில் வழியைக் காட்டிடவே
எரியும் விளக்கை நம்பிடுவார்
உருட்டுப் புரட்டாம் உலகத்தில்
உண்மை யாளனை நம்பிடுவார்.

உலகில் உள்ள மக்களெல்லாம்
உண்மை பேசி வாழ்ந்தாலே
அலகில் இன்பம் உண்டாகும்
அன்பும் பண்பும் நின்றோங்கும்.

ஊக்கம்

எண்ணிய எண்ணம் நிறைவேற
எவர்க்கும் ஊக்கம் வேண்டுமடா!
நண்ணிய பொருளும் நிலைத்திருக்க
நாளும் ஊக்கம் வேண்டுமடா!

ஊக்கம் கொண்டவன் முயற்சிசெய்யும்
ஒவ்வொரு செயலும் வெற்றியடா!
காக்கும் கடவுள் தடுத்தாலும்
கடமை வீரன் வென்றிடுவான்!

உயர்ந்த மலையும் கடுகாகும்
ஊக்க முள்ளவன் முன்னாலே
அயர்ந்து நிற்பவன் உள்ளத்தில்
அணுவும் பெரிதாய்த் தோன்றுமடா

எண்ணம்

எண்ணம் உயர்வாய் எண்ணுவாய்
எதையும் இனிதே எண்ணுவாய்
விண்ணை யெட்டிப் பிடிக்கவே
வேண்டும் என்றே எண்ணுவாய்

சின்னஞ் சிறிய செயல்பல
செய்யும் நினைப்பை விட்டுநீ
ஒன்று பெரிதாய் எண்ணினால்
உண்டாம் பெரிய நன்மையே

தனது நலமே எண்ணாதே
தழைக்கும் உலகிற் கதுதீமை!
மனிதர் எல்லாம் வாழவே
மனங்கொள் நீயும் வாழுவாய்!

ஏற்றம்

ஏறி ஏறிச் சென்றால் – எதையும்
எட்டிப் பிடிக்க லாகும்
ஏறா மலே நின்றால் – கீழே
ஏங்கி நிற்க நேரும்

பாடம் நன்றாய்ப் படித்தால் – நீ
பட்டம் பலவும் பெறுவாய்
சோடை யாக இருந்தால் – நீ
துன்பப் பட்டுத் திரிவாய்

கட்டுப் பெட்டி போல – ஒரு
கல்லுப் பிள்ளை யார்போல்
விட்ட இடத்தி லேயே – குந்தி
விழித்துக் கொண்டிராதே!

ஆற்றல் உள்ள வரைக்கும் – வெற்றி
அடையும் எல்லை வரைக்கும்
ஏறி ஏறிச் சென்றால் – எதையும்
எட்டிப் பிடிக்க லாகும்.

ஐயம்

ஆகுமா ஆகாதா? என்ற
ஆராய்ச்சிக்குப் பேர் ஐயம்!
இந்த ஆராய்ச்சிக்குப் பேர் ஐயம்!

வேகுமா வேகாதா?
வெந்தாலும் நன்றாய் இருக்குமா?
போகுமா போகாதா?
போனாலும் நன்மை விளைக்குமா?

நம்பலாமா கூடாதா?
நம்பினால் உண்மை இருக்குமா?
செம்புப் பாலைப் போலவே
வெள்ளையாய் மனம் இருக்குமா?

ஆகுமா ஆகாதா? என்ற
ஆராய்ச்சிக்குப் பேர் ஐயம்! இந்த
ஆராய்ச்சிக்குப் பேர் ஐயம்!

ஒழுக்கம்

ஒழுக்கம் உயர்வை உண்டாக்கும்
உண்மைப் புகழை உண்டாக்கும்
முழுக்க முழுக்கப் பாராட்டும்
மூத்தோர் நட்பை உண்டாக்கும்

நம்பிக் கையை உண்டாக்கும்
நன்மை யாவும் உண்டாக்கும்
துன்பந் தன்னை உடன்போக்கும்
தூயோர் உறவை உண்டாக்கும்

அறிவு மிக்கோர் பெய ரோங்கும்
ஆற்றல் மிக்கோர் செய லோங்கும்
உறவு கொண்டோர் வாழ் வோங்கும்
ஒழுக்கங் கொண்டோர் சிறப்போங்கும்!

ஓர்தல்

ஓர்தல் என்றால் ஆராய்தல் என்றே
உணர்ந்து கொள்ளடி – என் தங்கமே நீ
தெரிந்து கொள்ளடி.

ஓர்ந்து செய்த செயல்கள் வெற்றி
உண்டாக்கும் காணடி – என் தங்கமே நீ
நன்றாகப் பாரடி.

சிந்தித்துப் பின் செயல் புரிந்தோர்
சிறப்படைந் தாரடி – என் தங்கமே நீ
மறக்கலாகா தடி.

அறிவு மிக்கோர் ஆராய்ந் தேதான்
யாவும் செய்வாரடி – என் தங்கமே நீ
தானும் அறிவாயடி.

ஓர்தல் ஒன்றே உண்மை அறிவை
உயர்வாக்கும் காணடி – என் தங்கமே நீ
அயராமல் கேளடி!

ஒளவை

ஒளவைப் பாட்டி நமது பாட்டி
அழகு தமிழில் கவிதை சொல்லும்
அருமைப் பாட்டி பெருமூ தாட்டி
ஒளவைப் பாட்டி நமது பாட்டி

சின்னச் சின்னப் பிள்ளை யெல்லாம்
சேர்ந்து பாடத் தக்க வாறு
சின்னச் சின்ன வாக்கியத்தில்
செல்ல மாகப் பாடி வைத்தாள்

கையில் ஒற்றைக் கம்பை ஏந்திக்
கால்தள்ளாட ஊன்றிச் செல்வாள்
பையன் யாரும் வந்துவிட்டால்
பாட்டுப் பாடி வாழ்த்திச் செல்வாள்.

பாட்டுப் பாடு பாட்டி என்றால்
ஊற்று கூழை என்று சொல்வாள்
வாட்டந் தீரக் கூழ் குடித்து
வகைவகையாய்ப் பாட்டுச் சொல்வாள்!

அஃகேனம்

அடுப்புப் போலே மூன்று புள்ளி
அஃகேனம்

ஆய்த எழுத் தென்று சொல்லும்
அஃகேனம்

ஒளவன்னாவை அடுத்து வரும்
அஃகேனம்

அழகுத் தமிழை நிறைய வைக்கும்
அஃகேனம்

இணையில்லாமல் தனித் திருக்கும்
அஃகேனம்

எஃகு போலே உறுதி யானது
அஃகேனம்

கப்பல்

கப்பல் இது கப்பல்
கடல்கடந்து போகுமொரு கப்பல்
கரைவிட்டுக் கரைபோகும் கப்பல்

அடக்கிவைத்த யானையினைப் போலே
அலைகடலின் துறைமுகத்தின் ஒரம்
வடக்கயிறும் சங்கிலியும் கொண்டு
வகையாகக் கட்டிவைத்தார் பாரே!

விசைப்பொறியால் சரக்குகளை ஏற்றி
வேற்றுாரில் இறக்கிவிடும் கப்பல்
அசைந்தசைந்து கடல்மீது மிதந்தே
ஆட்களையும் ஏற்றிக்கொண்டு போகும்!

அலைகடலில் செல்லுகின்ற போதே
ஆடுகின்ற ஊஞ்சலைப்போல் இருக்கும்
தலைமயக்கம் வந்தாலும் கூட
கடற்பயணம் உடல்நலத்தைக் கொடுக்கும்!

பொங்கல்

பொங்கல் வந்தது சங்கு முழங்குது
தங்கையே எழுந்திரு!

எங்கும் இன்பமே தங்கி நிறைந்தது
தங்கையே எழுந்திரு!

விரும்பித் தின்றிடும் கரும்பும் இருக்குது
விரைந்து நீ ஓடிவா!

அரும்பு மலர்ந்தது போலச் சிரித்துநீ
அன்பேயிங் கோடிவா!

பட்டி லாடைகள் கட்டி மகிழ்ந்துநீ
பறந்திங்கே ஓடிவா!

கட்டி வெல்லமே! சிட்டுக் குருவியே!
கவிதைகள் பாடிவா!

சன்னல்

சன்ன லோரம் நின்று கொண்டே
என்ன தம்பி பார்க்கிறாய்?
மின்னல் போலே ஓடுகின்ற
வண்டி யெல்லாம் பார்க்கிறேன்!
அங்கும் இங்கும் செல்லுகின்ற
ஆட்களையும் பார்க்கிறேன்!

சன்ன லோரம் நின்று கொண்டே
என்ன தம்பி காண்கிறாய்?
வீதிக் காற்றும் ஓடிவந்து
வீட்டுக் குள்ளே நிறையுது!
மோதிப் பாயும் காற்றில் வெப்பம்
முழுக்க முழுக்கக் குறையுது.

சன்ன லோரம் நின்று கொண்டே
என்ன தம்பி காண்கிறாய்?
வீட்டுக் குள்ளே பூட்டிக் கொண்டு
வேறு வேறாய் இருந்தவர்
கூட்டும் உறவும் கொண்டு தெருவில்
குலவிப் பழகக் காண்கிறேன்!

ஊஞ்சல்

உந்தி உந்தித் தள்ளலாம்
உயர உயரப் போகலாம்
அந்த ரத்தில் ஏறியே
ஆடிக் கீழே இறங்கலாம்!

வான கத்தைத் தொட்டபின்
வந்து கீழே இறங்கலாம்
போன வேகத் தோடு பின்
புறத்தில் ஏறிப் போகலாம்!

மரமும் செடியும் கொடிகளும்
மற்றும் உள்ள பொருள்களும்
தரையோ டாடக் காணலாம்
தாவி ஊஞ்ச லாடினால்!

ஊஞ்ச லாடும் போதிலே
உலகம் ஆடல் போலவே
தோன்றும் காட்சி காணலாம்
துள்ளித் துள்ளி யாடலாம்!

படம்

அப்பா அப்பா வாருங்கள்
அழகான படம் பாருங்கள்
எப்போதும் இந்தப் படத்திலே
இருக்கும் தாத்தா சிரிக்கிறார்!

பல்லில் லாமல் என்னையே
பார்த்துப் பார்த்தேன் சிரிக்கிறார்?
சொல்ல வேண்டும் இப்போதே!
சொல்ல வேண்டும் அப்பாவே!

இந்த நாட்டில் சுதந்திரம்
ஏற்படத் தாம் உழைத்தவர்
இந்தத் தாத்தா தானப்பா!
காந்தித் தாத்தா காணப்பா!

பிழைத்து நாடு விடுதலை
பெற்ற தற்குச் சிரிக்கிறார்!
உழைத்த பலனும் கிடைத்ததால்
உண்மை யாகச் சிரிக்கிறார்!

மணம்

பூ மணக்குது தோட்டத்திலே – சந்தனப்
புகை மணக்குது வீட்டுக்குள்ளே
தேன் மணக்குது காட்டுக்குள்ளே – வெட்டி
வேர் மணக்குது நீருக்குள்ளே!

பச்சைக் குழந்தை சிரித்திருக்கும் – தாய்ப்
பால் மணக்குது வாயினிலே
மச்சு வீட்டிலே வைத்திருக்கும் – ஊது
வத்தி மணக்குது வாசலிலே!

பா மணக்குது செந்தமிழில் – பாடும்
வாய் மணக்குது மிகமிகவே!
பூ மணக்குது தோட்டத்திலே – நல்லோர்
புகழ் மணக்குது நாட்டினிலே!

தண்ணீர்

உலர்ந்து வறண்ட தொண்டை குளிர
உண்ண வேண்டும் தண்ணீரே
மலர்ந்து சிரிக்கும் பூஞ்செ டிக்கும்
வார்க்க வேண்டும் தண்ணீரே

சோறு வடிக்கக் குழம்பு வைக்கத்
தோசை மாவைக் கரைக்கவும்
வேறு சமையல் வேலை கட்கும்
வேண்டும் நல்ல தண்ணீரே

ஆறு குட்டை ஏரி கண்மாய்
அருவி ஓடை கேணியே
மாறில் லாது நீர் வழங்க
மழையு முண்டு பாரிலே

படகில் ஏறிக் கடலில் சென்ற
பையன் ஒருவன் கூறினான்: –
“அடடா! எங்கும் தண்ணீர்! தண்ணீர்!
அருந்தத் தானே முடியலே!”

நடை

குடுகுடு வென்று நடப்பவன் ஒரு
கோமாளி
கோணிக் கோணி நடப்பவன் ஒரு
நோயாளி
படபட வென்று நடப்பவன் ஒரு
பகட்டாளி
பையப் பைய நடப்பவன் ஒரு
சோம்பேறி.

நெஞ்சுயர்த்தித் தலைநிமிர்ந்து
சிங்கம் போலவே
நேராய் நடக்கும் வீரனுக்கே
பெருமை சேருமாம்
அஞ்சிடாத ஆண்மையோடு
காளை போலவே
அழகாய் நடக்கும் வீரனையே
யாரும் விரும்புவார்!

பந்து

உதைத் துதைத்துத் தள்ளியே
ஓடித் தொடர்ந்து செல்லுவார்
பதைப் படைந்தே எதிரிகள்
பாய்ந்து வந்து மறித்துமே
உதைத்த பந்து வானிலே
உயரக் கிளம்பி மீண்டுமே
குதித்து வந்த பக்கமே
‘கோலை’நோக்கி ஓடுமாம்!

கோலைக் காத்து நிற்பவன்
குறுக்கில் ஒடிப் பிடித்ததைக்
காலால் எற்றித் தள்ளுவான்
காற்றாய்ப் பறந்து போகுமே!
ஒல மிட்டுக் கூவியே
ஒடிப் பந்தை எதிரியின்
கோலுக் குள்ளே தள்ளினால்
கொள்ள லாகும் வெற்றியே!

மணி

ஆசை யோடு பக்த ரெல்லாம்
அணி வகுக்கவே
பூசை வேளை தோறும் கோயில்
மணி யடிக்குதே!

வேலை நேரம் காட்டத் தொழிற்
சாலை தன்னிலே
வேளை தோறும் மணியடிக்குது
காலை மாலையே!

கல்விக் கூடம் திறந்து மூடும்
காலம் காட்டவே
செல்வச் சிறுவர் அறிய மணியின்
ஓசை கேட்குதே!

மணிக்கு மணி கணக்குப் படி
எண்ணிக் காட்டியே
மணியடிக்குது சுவரில் உள்ள
அடிக்கும் மணிப்பொறி!

வயல்

வாட்ட மின்றி மக்கள்
வாழச் செய்யும் பயிரை
ஊட்டி ஊட்டி வளர்க்கும்
உரம் மிகுந்த வயலே

அன்றொரு நாள் பார்த்தேன்
அத்தனையும் பச்சை!
இன்று வந்து பார்த்தால்
எல்லாம் தங்கம்! தங்கம்!

கொத்துக் கொத்தாய் நெல்லைக்
கொண்டிருக்கும் பயிரே!
பத்தரைப் போல் தரையைப்
பார்த்துக் குனிந்தி ருக்கும்!

பொங்கலுக்கு முன்னே
புத்தரிசி தந்து
எங்கு மின்பம் சேர்த்தே
இன்ப மாக்கும் வயலே!

அரசர்

முன்னொரு காலத்திலே
செந்தமிழ் நாட்டினிலே
மூன்றுமன்னர் ஆண்டுவந்தார்
முறையாக ஆண்டுவந்தார்.

வரும்படியில் ஆறிலொன்று
வரியாகப் பெற்றுக் கொண்டு
தருமநீதி தழைத்தோங்கத்
தக்கபடி ஆண்டு வந்தார்.

வீரத்துடன் போர்புரியும்
வேங்கைகளாம் தமிழரசர்
சேர சோழ பாண்டியராம்
திருநிலத்தை ஆண்டவராம்.

பாண்டியர்க்கு மீன் கொடியாம்
பாயும் புலி சோழருக்காம்
ஆண்டிருந்த சேரருக்கோ
அழகான விற் கொடியாம்!

தட்டையாகத் தோன்றும் உலகம்
தட்டை யல்ல தம்பியே
உருண்டை யாக உள்ள தெனவே
உணர வேண்டும் தம்பியே.

நிலைத்த தாகத் தோன்றும் உலகம்
நிலைத்த தல்ல தம்பியே
உருண்டுருண்டு கதிரைச் சுற்றுது
உணர வேண்டும் தம்பியே.

பெரிய தாகத் தோன்றும் உலகம்
பெரிய தல்ல தம்பியே
உலகின் மிக்க பெரிது கதிரென்று
உணர வேண்டும் தம்பியே.

பகலும் இரவும் உலகைச் சேர்ந்தது
அல்ல அல்ல தம்பியே
கதிரின் ஒளியும நிழலும்அவையென்று
உணர வேண்டும் தம்பியே.

வண்ணங்கள்

இலையும் தழையும் குழையும் காயும்
எல்லாம் பச்சை பச்சை
தலையின் முடியும் விறகின் கரியும்
கண்ணின் மணியும் கருப்பு

பாலும் சுண்ண நீரும் அரிசி
மாவும் வெள்ளை வெள்ளை
மாலை வானும் நாவும் இரத்த
நீரும் காணில் சிவப்பு

காலை வெயிலும் மஞ்சட் கிழங்கும்
பொன்னும் நெல்லும் மஞ்சள்
நீலக் கல்லும் பொடியும் வானும்
கடலின் நீரும் ஊதா

ஆரஞ் சுப்பழம் கத்திரிப் பூவென்று
ஆய வண்ணம் இரண்டாம்
பாரில் இந்த நிறங்கள் கலந்த
பலப்பல வண்ணம் உண்டாம்.

பழம்

பழந் தின்னம்மா பழந்தின்னு
உரித்த வாழைப் பழந் தின்னு

பழுத் திருக்கும் மாம்பழம்
பலாப் பழத்தின் நற்சுளை
சாத்துக் கட்டி ஆரஞ்சு
சத்து நிறைந்த அன்னாசி
பார்த்துப் பறித்த பப்பாளி
பரங்கிச் சீமை ஆப்பிளி
பழந் தின்னம்மா பழந்தின்னு
உரித்த வாழைப் பழந்தின்னு

முத்துப் போலே மாதுளை
முழுதும் இனிக்கும் விளாம்பழம்
விற்றுத் திரியும் கொய்யாவும்
விழிபோல் கரிய நாவலும்
வாங்கி வாங்கித் தின்னம்மா
வயிறு நிறையத் தின்னம்மா
பழந் தின்னம்மா பழந்தின்னு
உரித்த வாழைப் பழந்தின்னு.

குளம்

ஊருக் கொரு குளம்-தண்
ணீருக் கொரு குளம்
கோயிலுக் கெதிரே-உள்ள
குடிக்கும் தண்ணீர்க் குளம்

வான மழை பெய்து-மடை
வாயின் வழி ஓடி
மீனுந் துள்ளிக் குதிக்க-நீர்
மிகுந்தி ருக்கும் குளம்

மட்டம் உயரக் கண்டு-ஊர்
மக்கள் உள்ளம் களிக்க
கட்டித் தேக்கி வைத்து-நீரைக்
காக்கும் தெப்பக் குளம்.

பறவை

குருவி ஒரு பறவை
கோழி ஒரு பறவை
அருவிக் கரை யோரம்
அலையும் கொக்கும் பறவை

கழுகும் ஒரு பறவை
காகம் ஒரு பறவை
அழகுத் தோகை விரித்தே
ஆடும் மயில் பறவை

சேவல் ஒரு பறவை
சிட்டும் ஒரு பறவை
கூவி இசை பாடும்
குயிலும் ஒரு பறவை.

வனம்

எங்கெங்கும் மரமடர்ந்தே
இருளடர்ந்த வனமே
எல்லோரும் போவதற்குப்
பயமடையும் வனமே

சிங்கம் புலி கரடி இரை
தேடுகின்ற வனமே
சிறுத்தைப்புலி காட்டெருமை
திரிந்திருக்கும் வனமே

குழிமுயலும் கலைமானும்
குள்ளநரி தானும்
கூட்டமாகப் பிளிறிவரும்
யானைகளும் வாழும்

வழி யெல்லாம் சரசரெனப்
பாம்புகளும் ஊரும்
வனமதிலே செல்வதற்குத்
துணிவுமிக வேணும்.

ஒன்று

ஒன்று ஒன்று ஒன்று
ஒழுக்க வாழ்வே நன்று
இரண்டு இரண்டு இரண்டு
என்றும் செய்யேல் முரண்டு
மூன்று மூன்று மூன்று
முயன்றால் வெற்றி தோன்றும்
நான்கு நான்கு நான்கு
நல்லோர் புகழே ஓங்கும்
ஐந்து ஐந்து ஐந்து
அன்பே வாழும் உயர்ந்து
ஆறு ஆறு ஆறு
அறிவு தான்முன் னேறும்
ஏழு ஏழு ஏழு
என்றும் நன்றே வாழும்
எட்டு எட்டு எட்டு
எவ்விப் பாய்த்தால் கிட்டும்
ஒன்பது ஒன்பது ஒன்பது
உதவா தேபொய் என்பது
முட்டை முட்டை முட்டை
முடிவில் லாத முட்டை.

இந்த புத்தகம் பிடித்திருந்தால்....

மதிப்பிட நட்சத்திரத்தைச் சொடுக்கவும்!!!

சராசரி மதிப்பீடு 0 / 5. வாக்கு எண்ணிக்கை: 0

இந்தப் பதிவிற்கு மதிப்பீடு அளிக்கும் முதல் நபராக இருங்கள்!!!

Leave a Reply

Your email address will not be published. Required fields are marked *