
சிறுவர் பாட்டு
நாரா. நாச்சியப்பன்
ஆத்தி சூடி
அமர்ந்த தேவனை
ஏத்தி யேத்தித்
தொழுவோம் யாமே.
-ஒளவையார்
அறஞ்செய விரும்பு
ஊரும் நாடும் வையகமும்
உய்யப் புரியும் செயலெல்லாம்
பேரும் புகழும் சேர்த்தளிக்கும்
பெருமை மிக்க நல்லறமாம்.
பிறரும் வாழ வேண்டுமெனும்
பெரிய எண்ணம் உண்டானால்
அறமும் செய்ய வேண்டுமெனும்
அறிவு பிறக்கும் நெஞ்சகத்தே
தண்ணீர்க் குளங்கள் தோண்டுவதும்
தாழ்ந்தோர்க் குதவி புரிந்திடலும்
எண்ணில் இன்பம் தரும் அறமே
இயன்ற வரையில் செய்வாயே.
ஆறுவது சினம்
தீயைக் கக்கும் எரிமலையும்
சீறி வீசும் புயல் காற்றும்
பாயும் வெள்ளப் பெருக் கெடுப்பும்
பாரில் தீமை மிக்கனவாம்,
ஒருவன் கொள்ளும் கோபத்தால்
உண்டாம் தீமை பலவாகும்
பருவம் தவறிப் பொழிகின்ற
மழைபோற் பயனைக் கெடுப்பதுவாம்,
ஒருவன் செய்கை பிடிக்காமல்
உள்ளம் சினத்தைக் கொள்ளுமெனில்
அறிவின் திறத்தால் அதை வென்றே
ஆறி யிருத்தல் நலமாகும்
இயல்வது கரவேல்
உதவி என்று வந்தொருவன் .
உன்னைக் கெஞ்சி நிற்பானேல்
அதனைச் செய்தல் அறமாகும்
அன்பை வளர்க்கும் நெறியாகும்.
முடிந்த அளவு பிறர்க்குதவ
முன்னிற் பதுவே பண்பாகும்
கடிந்து பேசி அனுப்புவதோ
கருணை யற்ற செயலாகும்.
கொடுக்க முடிந்த ஒன்றினையே
கொடுத்தல் உயர்ந்த குணமாகும்
வெடுக்கென் றில்லை எனக்கூறி
விரட்டா திருத்தல் சிறப்பாகும்.
ஈவது விலக்கேல்
தொழுது நிற்கும் ஒருவன்உறு
துன்பம் கண்டு மனமிரங்கிப்
பழுதில் லாத அன்புடனே
பரிந்து களைதல் நற்பண்பாம்.
தன்னால் உதவ இயலாதேல்
தருமம் செய்யக் கூடியவர்
இன்னார் என்று வழிகாட்டி
இனிதே அனுப்பல் நற்குணமாம்.
அன்பு மிகுந்து கொடுப்பவரை
ஆகா தென்று தடுத்திடலோ
துன்பம் பெருக்கும் செயலாகும்
தூய்மை யற்ற நினைப்பாகும்.
உடையது விளம்பேல்
உள்ள தெல்லாம் பிறர்அறிய
உரைத்தல் மிக்க பேதைமையாம்
கள்ளம் அற்றுப் பேசிடினும்
கருத்தில் மாற்றம் விளைத்திடுமாம்.
இல்லா தவர்பால் இருப்பதனை
எடுத்து ரைத்தால் அவர்மனத்தில்
பொல்லா எண்ணம் பலப்பலவாய்ப்
புகுந்து தீமை விளைத்திடலாம்.
இருக்கும் பொருளைப் பிறர்அறிய
எடுத்துச் சொல்லித் துன்பத்தைப்
பெருக்கிக் கொள்ளா திருப்பதையே
பெருக்கி இன்பங் கண்டிடலாம்.
ஊக்கமது கைவிடேல்
நல்ல பயனைத் தருஞ்செயலே
நாளும் செய்து வரவேண்டும்
செல்வம் சேரும் என்றாலும்
சேரா தெனினும் செயவேண்டும்.
இடர்கள் பலவே தோன்றிடினும்
எதிர்த்துப் பலபேர் நின்றிடினும்
தடைகள் பலவே நேர்ந்திடினும்
தளரா ஊக்கம் வேண்டுமடா.
ஊக்கம் உடையான் இறுதியிலே
உறுதி யாக வென்றிடுவான்
ஆக்கம் அடைவான், இன்பமெலாம்
அடைவான் என்றார் சான்றோரே.
எண்ணெழுத் திகழேல்
உலகில் அறிவைப் பெறுதற்கே
உற்ற துணையாய் இருப்பதெலாம்
புலமை மிக்க கிான்றோர்கள்
போற்றும் கல்வித் துறையேயாம்.
எழுதப் படிக்கத் தெரிந்தவன் தான்
எதையும் கற்றுக் கொண்டிடலாம்
பழுதில் லாமல் எண்ணுபவன்
பாரில் ஏமாந்தழ வேண்டாம்.
எண்ணத் தெரிந்தால் கணக்குவரும்
எழுதத் தெரிந்தால் படிப்புவரும்
எண்ணை எழுத்தை இகழாதே
ஏற்றுப் படிப்பாய் கண்ணே நீ.
ஏற்ப திகழ்ச்சி
உழைக்க இரண்டு கையிருக்க
உடலில் நல்ல வலுவிருக்க
பிழைக்க ஒன்றும் செய்யாமல்
பிச்சை ஏற்பது இழிவாகும்.
பெற்றோர் அன்பு கொண்டாடிப்
பேணி நம்மை வளர்த்தாலும்
கற்றுச் சிறந்து பெருமைபெறக்
கைமா றியற்றல் கடனாகும்.
பாடு பட்ட பலன்பெறலாம்
பரிசுப் பொருளை ஏற்றிடலாம்
தேடிச் சென்று பல்காட்டித்
தேவை முடித்தல் இழிவாகும்.
ஐயம் இட்டுண்
வாசல் தோறும் கைநீட்டி
வயிறு வளர்க்கும் ஏழைக்குப்
பாசத் தோடு சோறிடுதல்
பண்பு நல்ல பண்பாகும்.
வயிறு வளர்க்க நமைநாடி
வாழ்த்துப் பாடி வருவோரின்
துயரந் தீர்க்கச் சோறிடுதல்
தூய அறமே அதைப்புரிவாய்.
பிறந்தோ ரெல்லாம் வாழ்ந்திடவே
பெரிய வையம் உண்டென்னும்
அறந்தான் உள்ளம் கொண்டிடுவாய்
ஐயம் இட்டுச் சோறுண்பாய்.
ஒப்புர(வு) ஒழுகு
ஒருவர்க் கொருவர் துணைசெய்தே
ஒற்று மையாய் வாழ்ந்திடலே
பெருவை யத்தின் நெறியாகும்
பெரியோர் போற்றும் ஒப்புரவாம்.
ஒன்றாய்ப் பழகு வோர்க்கெல்லாம்
உதவி செய்தல் கடனாகும்
நன்றாய் அவர்தம் நட்புறவை
நாளும் வளர்த்தல் நலமாகும்.
சான்றோர் போற்றும் ஒப்புரவாம்
தரும நெறியை மேற்கொண்டே
ஈன்றோர் மகிழ இவ்வுலகில்
இன்ப வாழ்வு நடத்திடுவாய்.
ஓதுவ தொழியேல்
பள்ளிக் கூடம் சென்றங்கே
படித்தால் போதும் என்றெண்ணித்
துள்ளி ஓடி விளையாட்டே
துணையாய்க் காலம் போக்காதே.
மாலைப் போதில் விளையாடு
மற்றப் போதில் அறிவுதரும்
நூலைத் தேர்ந்து படித்திடுவாய்
நோயாம் மடமை போக்கிடுவாய்.
பள்ளிப் பருவம் சென்றபினும்
படிக்கும் பழக்கம் நிறுத்தாதே
வெள்ளக் கடல்போல் விரிந்திருக்கும்
வித்தை நூல்கள் பலகற்பாய்.
ஓதுவ தொழியேல்
பள்ளிக் கூடம் சென்றங்கே
படித்தால் போதும் என்றெண்ணித்
துள்ளி ஓடி விளையாட்டே
துணையாய்க் காலம் போக்காதே.
மாலைப் போதில் விளையாடு
மற்றப் போதில் அறிவுதரும்
நூலைத் தேர்ந்து படித்திடுவாய்
நோயாம் மடமை போக்கிடுவாய்.
பள்ளிப் பருவம் சென்றபினும்
படிக்கும் பழக்கம் நிறுத்தாதே
வெள்ளக் கடல்போல் விரிந்திருக்கும்
வித்தை நூல்கள் பலகற்பாய்.
அஃகஞ் சுருக்கேல்
கடையில் வைத்துத் தானியங்கள்
காசு பெற்று விற்பவனும்
எடையில் படியில் குறைசெய்தே
ஏமாற் றுவது தீதாகும்.
பாலில் தண்ணிர் கலப்பதுபோல்
பருக்கைக் கல்லை அரிசியிலே
நாலுக் கொன்றாய்க் கலப்பவனும்
நல்லோ னாக இருப்பானோ?
ஊரா ரெல்லாம் பழித்தேசும்
ஒருவன் வாழ்வும் வாழ்வாமோ?
யாரேனும்மிவ் வாழ்வுதனை
அடைய விரும்பு வாருண்டோ?
கொன்றை வேந்தன்
செல்வன் அடியினன
என்றும் ஏத்தித்
தொழுவோம் யாமே.
அன்னையும் பிதாவும் முன்னறி தெய்வம்
பிள்ளை வேண்டும் வேண்டுமெனப்
பெரிதும் நல்ல தவமிருந்தே
உள்ளம் மகிழப் பெற்றோர்கள்
உண்மை நமது பெற்றோரே.
ஊறும் அன்பால் நாள்தோறும்
ஊட்டி வளர்த்து நலஞ்சேர்ப்பார்
வேறு தெய்வம் இவர்போலே
விரும்பி நம்மைக் காத்திடுமோ?
கண்ணின் இமைபோல் நமைக்காப்பார்
கைமா றெதுவும் கருதாரே
எண்ணில் இனிய தெய்வமிவர்
எதிரில் தோன்றும் தெய்வமிவர்.
ஆலயம் தொழுவது சாலவும் நன்று
கடலும் மலையும் உலகெல்லாம்
காணும் பொருள்கள் அவையெல்லாம்
உடலும் உயிரும் அறிவெல்லாம்
உண்டாக் கியவன் இறைவனடா.
எல்லா இடமும் அவனிடமே
எல்லாப் பொருளும் அவன் பொருளே
எல்லாப் பொழுதும் அவன்பொழுதே
இதனை நீநன் குணர்ந்திடுவாய்.
ஆல யம்போய் நாள்தோறும் –
அவனைப் போற்றித் தொழுவதனால்
சீலம் பெருகும். நன்மையெலாம்
சேரும் என்றார் சான்றோரே.
இல்லற மல்லது நல்லற மன்று
பெரியவ ரான பின்னாலே
பெண்ணும் ஆணும் ஒன்றாகித்
திருமணம் செய்து கொண்டினிது
சேர்ந்து வாழ்வது இல்லறமாம்.
இல்லற வாழ்வால் குடிவழியே
இனிது தழைக்கும் என்பதனால்
நல்லற மென்றே பெரியோர்கள்
நவின்றார் அச்சொல் போற்றிடுவாய்.
துறவு பூண்டு வாழ்வதுவே
தூய வாழ்வென் பார்சிலரே
அறமன் றென்றே நல்லறிஞர்
அதனை ஒதுக்கி விட்டாரே.
ஈயார் தேட்டைத் தீயார் கொள்வர்
தேடித் தேடிப் பணம்சேர்ப்பார்
சேர்த்த தெல்லாம்பெட்டகத்தே
மூடி மூடிப் பூட்டிவைப்பார்
முயன்று மேலும் சேர்த்திடுவார்.
உறவுக் காரர் யாருக்கும்
உதவி புரிய மாட்டாரே
அறமும் செய்யார் மக்கட்கும்.
அளியார்கருமித் தனத்தாலே.
ஈயா திருப்புப் பெட்டகத்தே
இறுக்கி வைத்த பணமெல்லாம்
தீயார் பொல்லார் திருடர்க்கே
சேரும் இறுதிக் காலத்தே|
உண்டி சுருங்குதல் பெண்டிர்க் கழகு
அளவாய் உண்ண வேண்டுமென
ஒளவைப் பாட்டி சொல்லியசொல்
இளம்பெண் கட்கும் ஆடவர்க்கும்
இருபா லார்க்கும் தகுஞ்சொல்லே.
மிகுந்த உணவால் செரிமான்ம்
மெதுவாய் நடக்கும்; சோம்பல்மிகும்
புகுந்து நோய்கள் உடலினிலே
பொறுக்க முடியாத் துன்பியற்றும்.
வாயைக் கட்டி வாழ்வோர்க்கே
வயிறு நன்றாய் இருந்திடுமாம்
தூய உடலும் நல்வாழ்வும்
சுறுசுறுப்பும் உண்டாமே!
ஊருடன் பகைக்கின் வேருடன் கெடும்
காசு மிகவைத் திருந்தாலும்
கல்வி மிகக்கற் றிருந்தாலும்
நேசம் ஊரார் பாலின்றேல்
நிலைகெட் டழிய நேர்ந்திடுமே.
பழக்க வழக்கம் மாறிடினும்
பண்பில் லாது நடந்திடினும்
இழக்க நேரும் அவரன்பை
இயைந்து வாழ்தல் நன்றாகும்.
ஊரா ரெல்லாம் போற்றிடவே
உகந்த முறையில் நடந்திடுவோன்
சீராய் வாழ்வான் நலங்காண்பான்
சிறப்பு மிகப்பெற் றின்புறுவான்.
எண்ணும் எழுத்தும் கண்ணெனத் தகும்
உலகில் உள்ள தொழிற்கெல்லாம்
உயிராய் இருப்பது கணக்காகும்
பலகால் அதனைக் கருத்துன்றிப்
பயிலல் மிக்க சிறப்பாகும்.
எழுத்துக் கூடிச் சொல்லாகி
இயைந்து கருத்துத் தொடராகி
உளத்துப் பிறந்த எண்ணமெலாம்
உரைக்கும் மொழியாய் விரிவாகும்.
வழுவில் லாத மொழிபேச
வகைசெய் கின்ற இலக்கணமும்
பழுதில் லாத தொழில்செய்யப்
பயனாம் கணக்கும் இருகண்ணாம்.
ஏவாமக்கள் மூவா மருந்து
ஒருவர் சொல்லும் குறிப்பைத்தான்
உடனே அறிந்து செயலாற்றல்
பெருமை தருமோர் திறனாகும்
பேணி வளர்க்கத் திருவாகும்.
தந்தை வேலை ஏவுமுனம்
தானே முடித்துத் தரும்பிள்ளை.
சிந்தை களிக்கச் செயப்பிறந்த
தெய்வ மருந்துக் கொப்பாவான்.
ஏவிச் செய்வார் நன்மக்கள்
என்றும் செய்யார் கீழ்மக்கள்
ஏவா முன்னம் குறிப்பறிந்தே
இயற்று வோரே பொன்மக்கள்!
ஐயம் புகினும் செய்வன செய்
தெய்வம் வந்தே தடுத்தாலும்
தீமை வந்தே அடுத்தாலும்
செய்யத் தக்க செயலெல்லாம்
செய்ய வேண்டும் எப்போதும்.
வறுமை யுற்றுக் கிடந்தாலும்
வாடிப் பிச்சைக் கலைந்தாலும்
சிறுமை யற்ற நற்செயலே
செய்ய வேண்டும் எப்போதும்.
துன்பம் தனக்கு நேர்ந்தாலும்
துயரந் தன்னைச் சேர்ந்தாலும்
இன்பம் பிறர்க்குத் தருஞ்செயலே
இயற்ற வேண்டும் எப்போதும்.
ஒருவனைப் பற்றி ஓரகத் திரு
தூய குணங்கள் உடையவனைத்
துணையாய்ப் பெறுதல் சிறப்பாகும்
ஆய இன்பம் அத்தனையும்
அவனால் அடையப் பெறலாகும்
நாட்டில் உள்ள நலமெல்லாம்
நல்லோன் ஒருவன் துணைவந்தால்
வீட்டில் வந்து சேர்ந்துவிடும்
வெள்ள இன்பம் தேங்கிவிடும்.
குடி யிருக்கும் ஓரிடமும்
கூடுந் துணையும் நன்றானால்
விடியும் பொழுதும் இன்பந்தான்
விளையும் பயனும் இன்பந்தான்!
ஓதலின் நன்றே வேதியர்க் கொழுக்கம்
அறநூல் பலவே ஆய்ந்திடலாம்
அவற்றின் நுட்பம் தேர்ந்திடலாம்
பிறரும் அறியக் கூறிடலாம்
பிறழா மல்தான் இருந்திடினே.
ஊருக் கெல்லாம் அறங்கூறி
ஒழுக்கம் தான்கைக் கொள்ளாதோன்
பாரில் அற்பப் பதராவான்
படித்த தெல்லாம் வீணாமே!
ஒழுக்கம் தவறா வாழ்வுதனை
உடையான் உலகைத் தன்வழியில்
இழுக்கும் ஆற்றல் பெற்றிடுவான்
இணையில் தலைவன் ஆகிடுவான்.
ஒளவியம் பேசுதல் ஆக்கத்திற் கழிவு
உலக மக்கள் எல்லோரும்
உயர்ந்த வாழ்வு பெற்றின்ப
நலங்கள் எய்த வேண்டுமென
நாடி உழைத்தல் அறிவாகும்.
வாழும் ஒருவன் நிலைகண்டு
வாடிப் புழுங்கிப் பேசுவது
தாழும் அறிவாம்: தன்நிலையைத்
தானே தாழ்த்திக் கொள்ளுவதாம்.
ஆக்கம் மிக்கார் போல்தானும்
அனைத்து நலமும் பெறவேண்டின்
ஊக்கத் தோடே எந்நாளும் – – –
உழைத்து.முயன்றால் உயர்வுண்டாம்.
அஃகமும் காசும் சிக்கெனத் தேடு
சேருங் காலம் சேர்த்தால்தான்
தேவை யுள்ள காலத்தே
யாரும் உதவா விட்டாலும்
அனுபவித்துக் கொளலாகும்.
உரிய பருவம் தேடாமல்
உறங்கிக் கிடந்து விட்டாற்பின்
பெரிய தேவை வரும்போது
பேத் லிக்க நேருமே.
பருவ மறிந்து தானியமும்
பணமும் தேடிக் கொண்டாற்பின்
வருவா யற்ற காலத்தே
வாட்ட மின்றி வாழ்ந்திடலாம்!
முற்றும்.
★ ★ ★



